Джилек пише. Эльмаз Бахшыш

 Джилек пише

Кунеш нурын джайдыра,
Сыджакъ-сыджакъ къыздыра.
Джиектеки джилеклер
Бирер-бирер къызара

Татий, татий, татийлер
Постал кийип кетелер,
Джилекнинъ джиегине
Аман барып етелер.

Бири сары, бири ал,
Тек пишкенин джыйып ал.
Къызыл сою пек татлы
Керекмез шекернен бал.
                     Эльмаз Бахшыш 
 

Мусафирликке баргъан Къаргъа акъкъында масал. Эльмаз Бахшыш.

Мусафирликке баргъан Къаргъа акъкъында масал

Къыш куню. Уча Къаргъа,
Къувана ягъгъан къаргъа.
Гъагъасыны ача кенъ,
Гъаркъылдап куле о шенъ!

Кийген елек, пуллы фес,
Корип шашаджакъ эр кес.
Такъкъан инджи боюнджакъ,
Кезинмеге бараджакъ!

Сансар ханым теректе
Ювасын сипирмекте.
Темизликни о север,
Эллери де пек чебер.

Япракълар уча. Эльмаз Бахшыш

Япракълар уча 
Кузьде япракълар уча, 
Тёпеде авеленип.
Сарылар къайда къача,
Шытыр-шытыр шенъленип?

 - Серин ельнен берабер
Авада курешелер.
Ойнашып, къатмер-къатмер
Топракъкъа ерлешелер.
                                   Эльмаз Бахшыш 

Татлы шиир. Эльмаз Бахшыш

Татлы шиир 
Орман чети чайырчыкъ
Анда осе къызылчыкъ.
Яз кельген сонъ пишелер
Къызыл дане емишлер.

Кичкенечик Фазылчыкъ
Язда джыя къызылчыкъ.
Лезетлидир татлысы, 
Аша, олур файдасы.
                               Эльмаз Бахшыш  

Табакъ ве тимсах. Эльмаз Бахшыш 

Табакъ ве тимсах
 
Табакъны ташый тимсах.
Табакъта – татлы къабакъ.
Тепси- тепси даркъата,
Балаларгъа ашата.
 
Татлы къабакъ, бал къабакъ,
Кунеште пишкен къабакъ.
Ашадыкъ, тойды къурсакъ,
Тешеккюр санъа, тимсах.
        Эльмаз Бахшыш     
 

Бакъа. Эльмаз Бахшыш

Бакъа

Озенде бакъа яшай,
Чиркийлер тутып ашай.
Йырламагъа истидат
Къалдыргъан онъа эдждат.

Шенъ шакъаджы бакъачыкъ,
Къурсагъы томалачыкъ,
Концертке саба эрте
Джумлени давет эте.

Озендеки сакинлер,
Балыкълар ве сюлюклер,
Атта терс юрген къыскъач,
Къарыны олса да ач,
Темашагъа етише,
Дикъкъат иле ерлеше.

Бабам къурды бир багъча. Эльмаз Бахшыш

Бабам къурды бир багъча
Бабам къурды бир багъча:
Алма, армут ве алча.
Баарьде чечек ача,
Язда берекет сача.

Элиме сепет алдым,
Багъчамызны доландым,
Мейваларнынъ пишкенин
Сепетиме толдурдым.

Битам емиш къурутыр,
Анам пекмез къайнатыр.
Къышта чайнен берабер
Татам софра донатыр.
        Эльмаз Бахшыш     

Кобелек. Эльмаз Бахшыш

Кобелек.
Ёлдан таптым мен чечек,
Устюнде бар кобелек.
Къанатлары ренгаренк,
Дерсинъ, орьнекли кольмек. 

Не къыдыра кобелек,
Гульден онъа не керек? 
Шырасыны эмерек
Ойнап, кунь кечиреджек.
                        Эльмаз Бахшыш     
 

Saifeler

Subscribe to Edebiyat