АЛЛА КЪЫСМЕТ ЭТСЕ
Насреддин оджа къомшусындан борджгъа 100 кумюш пара сорай ве беш куньден
къайтарып беририм, дей. Къомшусы 100 кумюш бермеге разы ола ве дей: 
– Алла къысмет этсе, иншалла беш куньден къайтарып берирсинъиз. 
– Эльбетте, Алла къысмет этсе, беш куньден къайтарып кетиририм, – дей оджа ве параны
алып кете. 
Беш кунь кече, алты кунь кече, он кече, оджа параны алып кельмей. Ниает къомшусы
оджанынъ эвине келип: 
– Косьтерген муддетинъиз чокътан кечти, алгъан паранъызны къайтармайсыз, – дей. 
Оджа: 
– Алла къысмет эткен олса, кетиреджек эдим, амма къысмет этмеди, – деген. 
 
ALLA QISMET ETSE 
Nasreddin oca qomşusından borcğa 100 kümüş para soray ve beş künden qaytarıp beririm, dey. 
Qomşusı 100 kümüş bermege razı ola ve dey: 
– Alla qısmet etse, inşalla beş künden qaytarıp berirsiñiz. 
– Elbette, Alla qısmet etse, beş künden qaytarıp ketiririm, – dey oca ve paranı alıp kete. 
Beş kün keçe, altı kün keçe, on keçe, oca paranı alıp kelmey. Niayet qomşusı ocanıñ evine kelip: 
– Köstergen müddetiñiz çoqtan keçti, alğan parañıznı qaytarmaysız, – dey. 
Oca: 
– Alla qısmet etken olsa, ketirecek edim, amma qısmet etmedi, – degen. 

 

Категория: 
Менба: 
http://medeniye.org

Янъы тефсир язынъ