Мусафирликке баргъан Къаргъа акъкъында масал. Эльмаз Бахшыш.

Мусафирликке баргъан Къаргъа акъкъында масал

Къыш куню. Уча Къаргъа,
Къувана ягъгъан къаргъа.
Гъагъасыны ача кенъ,
Гъаркъылдап куле о шенъ!

Кийген елек, пуллы фес,
Корип шашаджакъ эр кес.
Такъкъан инджи боюнджакъ,
Кезинмеге бараджакъ!

Сансар ханым теректе
Ювасын сипирмекте.
Темизликни о север,
Эллери де пек чебер.

Къаргъа ян далгъа энди:
«Мераба, Сансар!» - деди.
«Хош кельдинъ, Къаргъа ханым,
Буюр эвиме, джаным!

Мусафир ол, тёрим бош,
Этерим гонълюнъни хош,
Фырынымда бир табакъ
Фындыкълы татлы къабакъ».

Къаргъа аман етише,
Азыр тёрге ерлеше.
Сансар вирв чапкъалай, 
Сыйлы софра азырлай:

Фындыкълар ве джевизлер,
Мантарлар ве емишлер,
Фурундан шу бир табакъ
Балабан татлы къабакъ…

Къаргъа корип софраны
Унутты намус-арны.
Учып къонды табакъкъа, 
Сонъ япышты къабакъкъа,

Емишлерни таптады,
Джевизлер тыпырдады…
Софра перишан олды,
Сансарнынъ гонълю солды.

Мусафир чыкъып ойнай,
Онъа шаша къонакъбай.
Учаджакъ ола къаргъа,
Ура башын диваргъа.

Къарр-къарр, къарр-къарр!
Сенинъ эвинъ манъа тар!
Учаджакъ олсам, ер ёкъ.
Артыкъ, къурсагъым да токъ.

Сен, Сансарым, яхшы къал,
Башкъа эв тап – бол ве сал.
Кельгенимде бир даа
Мейдан олсун учмагъа».

Нанкёр къуш къанат кере,
Гъаркъылдап учып кете.
Сансар исе эвинде
Къала ой-тюшюнджеде:

Не тешеккюр, не урьмет,
Къайда къалгъан незакет!
Софра къойса къонакъбай
Мусафир оны таптай.

Не экен де, не экен - 
Меним эвим тар экен!
Келеджекмиш бир даа…
Кирсетмем ич одагъа!

Сыйламагъа чагъырмам,
Онъа софра донатмам!
Башта эвине барсын,
Тербиесини алсын!
                                          Эльмаз Бахшыш.
 

Категория
Источник
https://anaurt.com

Комментарии